Anaitasunak talde nagusiek garaipenarekin eta berdinketarekin amaitu dituzte aste honetako jardunaldiak. Emakumeen taldeak Txerloan jokatu zuten partida atzo arratsaldean Gasteizko Aranbizkarra taldearen aurka, eta partida osoan izan ziren azkoitiarrak nagusi. 2. minuturako sartu zuen Enarak taldearen aurreneko gola, Mariaren erdiraketa ezin hobeto baliatuta. 11. minutuan sartu zuen Mariak azkoitiarren bigarren gola, eta hirugarrena ere Mariak berak sartu zuen, 17. minutuan. Lehen zatian iritsi zen gorrixen laugarren gola ere, Arrik sartua. Bigarren zatian ere nagusi izan zen talde azkoitiarra. Aurkariei ez zien aukerarik eman, eta 70. minutuan Arrik taldearen bosgarren gola sartzea lortu zuen. Azkenean, markagailua 5-0 zela amaitu zuten norgehiagoka, eta garaipen bikaina eskuratu zuten gorrixek etxean.
Gizonen taldeak, berriz, etxetik kanpo jokatu zuen aste honetako partida, Leioa taldearen aurka, hango futbol zelaian. Lehen zatian aukeraren bat izan zuen Anaitasunak, baina golik sartu gabe iritsi ziren atsedenaldira. Bigarren zatia ere berdintsua izan zen, eta hutsean berdinduta amaitu zuten azkenean neurketa. Azkoitiarrak puntu bat eskuratuta itzuli ziren Leioatik etxera.